ETXERIK GABEKOEN EGUNA
Xirimiri
Hilabete honen 22an etxerik gabekoen eguna ospatuko dugu. Eta niri zer? Eta zuri? Ez dut uste ospatzea hitzik egokiena denik. Zer ospatzen dugu?
Gure hirietan eta gure hirietako kaleetan, gero eta jende gehiago bizi da. Bilbon bertan, 170 gizon-emakume baino gehiago bizi da horrela. Eguna joan eta eguna etorri eta ez dute beraien lekua aurkitzen.
Eta niri zer? Ba, niri zer edo zer esaten didate. Duela 25 urte, eta Bilboko auzo famatu batean, Otxarkoaga izenekoa, gure artean etxerik gabeko batzu onartzen hasi ginen. Urte hauetan jende asko bizi izan da gure artean eta egia esan, denetatik izan dugu. Baina urtetan zehar, gero eta jende gehiago onartu dugu, horrexegatik udal jabetza duten etxe batzu -20ren bat- alokatu ditugu. Etxe bakoitzean hiru edo lau lagun elkarrekin bizi dira eta bizitza arrunta egiten dute; gure artean onartuak sentitzen direlako. Hauek ez dira kale gorrian bizi.
Hala ere, ezin izan dugu kalean bizi diren guztiei behar besteko laguntza eman. Guggenheim museo famatutik gertu, Bilboko udalak zeukan etxe handi batean aterpetxe bat eraiki zuen duela sei urte. Aterpetxe honen kudeaketa gure elkartearen eskutan utzi zuen, baina aterpe honetan ezin dira egunean zehar egon, afaldu eta lo egin dezakete soil-soilik. Hauek dira udalaren planak eta guk horrela onartu behar izanditugu..
Baina egunean zehar, non eman eguna gizon-emakume hauek? Errekalde auzoan lokal bat lortu genuen eta iadanik sei urte igaro dira proiektu honekin hasi ginenetik. Orain arte ez dugu arazorik izan, baina lokal hau oso txikia geratu zaigu eta beste lokal bat aurkitu dugu, Txurdinaga auzoan. Bilboko udalak obrak egiteko baimena eman zigun eta obra hauek bukatzear daude. Baina bitartean, auzokideak hasi dira gure ekintza honen kontra manifestazioak eta asanbladak egiten. Ez daude bakartasunean auzokide hauek. Manifestapen hauetan gizon emakume polítikoak parte hartu dute eta orain arte ez dugu alderdien laguntzarik aurkitu. Nork espero zuen hau? Noiz hasiko gara besteak onartzen? Zer nolako gizartea ari gara eraikitzen? Aldi berean ere, alderdi politikoek ez digute bere laguntza ematen. Badute non lortu datozen hauteskundetarako botoak. Mundu nazkagarri hau!
Etxerik gabekoen eguna!
JOSEBA BAKAIKOA
Joseba,
Txurdinaga auzoan zabaldu nahi duzuena aipatu duzu, eta horretaz nahi dizut idatzi. Ezin zaio munduari nazkagarria deitu norberari arrazoia ematen ez diolako. Inoiz onartu beharko edo ikasi beharko duzu norberaren erabakiaren inposaketa ez dela bidea. Zu ez zara besteak baino hobea, zu ez zara egiaren jabe bakarra. Aspaldian erlijioek erabiltzen zuten mezua zaharkiturik gelditu zen: "nire egia da bakarra, salbazioa nire bitartez besterik ez". Zu asmo onarekin bazabiltza, hori besteoi ere suposatu behar diguzu. Amaitu da "denak balio du " nik nahi dudana lortzeko. Gizartean bizitzea da gizarteari ere entzutea, zuek egin ez duzuena Txurdinagan.
Kalean bizi nahi dutenei irtenbide egokia eman behar zaie eta erakunde publikoek ezarri behar dituzte arauak, ez inizitiba pribatu batek. Kasu honetan, gainera nire ustez ez diezue irtenbide egokia ematen: kokalekua ez da egokia erabiltzaileentzat, kalean egoten jarraitzen dute.
Jesusen mezuari jarraitu nahi badiogu apaltasuna eta zintzotasuna izan behar dugu presente. Jokabidea beti garbian aritu beharko ginateke, inolako azpijokurik gabe.